Þýska landsliðskonan Lena Oberdorf verður frá keppni næstu mánuðina vegna hnémeiðsla sem hún varð fyrir í leik Þýskalands og Austurríkis í riðli Íslands í undankeppni EM kvenna í fótbolta í gærkvöldi.
Oberdorf, sem er 22 ára og ein besta miðjukona Evrópu, sleit krossband í leiknum, sem endaði með 4:0 sigri Þýskalands.
Hún missir því af Ólympíuleikunum með þýska landsliðinu og stórum hluta komandi tímabils í þýsku 1. deildinni.
Oberdorf er nýorðin liðsfélagi Glódísar Perlu Viggósdóttur hjá Bayern München en hún var áður liðsfélagi Sveindísar Jane Jónsdóttur hjá Wolfsburg.