Lét vita af sér í Meistaradeildinni

Hollenska liðið Twente tryggði sér í kvöld sæti í riðlakeppni Meistaradeildar Evrópu í fótbolta með öruggum heimasigri á Osijek frá Króatíu, 4:0. Twente vann fyrri leikinn 4:1 og einvígið 8:1.

Amanda Andradóttir lék seinni hálfleikinn með Twente og lagði upp fjórða markið á 50. mínútu. Hún hefur leikið vel með Twente síðan hún kom til félagsins frá Val í sumar.

Juventus er einnig komið áfram eftir sigur á París SG á útivelli, 2:1. Juventus vann einvígið 5:2.

Roma átti ekki í neinum vandræðum með að sigra Servette frá Sviss. Roma vann útileikinn í kvöld 7:2 og einvígið samanlagt 10:3.

Þá eru stórliðin Manchester City og Real Madrid einnig komin áfram. City vann París FC, 3:0, á heimavelli í kvöld. Urðu samanlagðar lokatölur 8:0. Real vann Sporting frá Portúgal á heimavelli í kvöld, 3:1, og einvígið 5:2.

Þá sneri Arsenal taflinu við gegn sænska liðinu Häcken og vann 4:0 heimasigur í kvöld. Häcken vann fyrri leikinn 1:0 en það dugði skammt. 

• Blogga um frétt