Fjórar íslenskar landsliðskonur leika í riðlakeppni Meistaradeildar kvenna í fótbolta í vetur og tvær þeirra mætast en dregið var í riðlana rétt í þessu í höfuðstöðvum UEFA í Sviss.
Þýskalandsmeistarar Bayern München, með Glódísi Perlu Viggósdóttur sem fyrirliða, eru í riðli með norsku meisturunum Vålerenga en með þeim leikur landsliðsbakvörðurinn Sædís Rún Heiðarsdóttir frá Ólafsvík.
Óhætt er að segja að Vålerenga fái stórleiki því liðið er í riðli með stórveldunum Bayern, Arsenal og Juventus.
Sveindís Jane Jónsdóttir leikur með Wolfsburg frá Þýskalandi og Amanda Andradóttir leikur með hollensku meisturunum Twente.
Riðlarnir fjórir eru þannig skipaðir:
A-riðill: Lyon (Frakklandi), Wolfsburg (Þýskalandi), Roma (Ítalíu), Galatasaray (Tyrklandi).
B-riðill: Chelsea (Englandi), Real Madrid (Spáni), Twente (Hollandi), Celtic (Skotlandi).
C-riðill: Bayern München (Þýskalandi), Arsenal (Englandi), Juventus (Ítalíu), Vålerenga (Noregi).
D-riðill: Barcelona (Spáni), Manchester City (Englandi), St. Pölten (Austurríki), Hammarby (Svíþjóð).
Riðlakeppnin hefst 8. október og lýkur 18. desember en tvö efstu liðin úr hverjum riðli komast áfram í átta liða úrslit keppninnar.