KA er bikarmeistari kvenna í blaki í fyrsta skipti eftir 3:1-sigur á HK í úrslitaleik Kjörísbikarsins í Digranesi í dag. KA er deildameistari eftir harða baráttu við HK og munaði aðeins einu stigi á liðunum í Mizuno-deildinni í vetur og mátti því búast við spennandi leik.
HK byrjaði vel og komst í 7:3 í fyrstu hrinunni, en þá kom gott svar frá KA sem jafnaði í 9:9 og komst svo í 12:9. KA komst í kjölfarið í 19:13. Í stöðunni 21:14 kom glæsilegur kafli hjá HK-konum og tókst þeim að minnka muninn í 21:18 og loks jafna í 24:24, þar sem KA réð illa við flottar uppgjafir HK. Það dugði hins vegar ekki til að lokum því KA vann hrinuna 29:27 og komst í 1:0.
Aftur byrjaði HK vel í annarri hrinu og komst í 15:7. Þá tók Miguel Castrillo, þjálfari KA, leikhlé. KA minnkaði muninn í 17:10. Þá komu sex stig í röð hjá HK sem fór langt með að tryggja sigurinn í hrinunni. Að lokum fór hrinan 25:12, HK í vil, og var leikurinn því jafn, 1:1.
Strax í byrjun þriðju hrinu þurfti Matthildur Einarsdóttir í liði HK að fara af velli vegna meiðsla. Matthildur er afar góður leikmaður og hafði fjarvera hennar áhrif á leikinn. KA komst í 6:1 í byrjun hrinunnar. Norðankonur héldu áfram að bæta í forskotið á næstu mínútum og var það mest tíu stig, 19:9. Svo fór að KA vann hrinuna sannfærandi, 25:16, og gat því tryggt sér bikarmeistaratitilinn með sigri í fjórðu hrinu.
KA var sterkari aðilinn í fjórðu hrinu og komst í 9:4 og svo 13:7. HK reyndi hvað það gat til að minnka muninn, en KA var með svör við öllu sem HK reyndi. KA komst í 20:13 og vann að lokum hrinuna 25:19 og leikinn 3:1.
Helena Kristín Gunnarsdóttir skoraði 17 stig fyrir KA og Hulda Elma Eysteinsdóttir 12. Elísabet Einarsdóttir var stigahæst hjá HK með 23 stig og Hjördís Eiríksdóttir skoraði 13.