FIFA, Alþjóðaknattspyrnusambandið, mun funda á næstu dögum vegna hegðunar leikmanna kvennalandsliðs Kamerún í leiknum við England í sextán liða úrslitum heimsmeistaramótsins í Frakklandi.
Enska liðið var allt annað en sátt við tilburði leikmanna Kamerún. Tvívegis þurfti að stöðva leikinn í nokkrar mínútur þar sem Kamerúnar mótmæltu ákvörðunum kínverska dómarans Qin Liang.
Auk þess hrækti Augustine Ejangue á Toni Duggan, Yvonne Leukio gaf Nikita Parris olnbogaskot í andlitið og Alexandra Takounda traðkaði ofan á Steph Houghton. Ekki er ósennilegt að einhverjir leikmenn fari í bann vegna atvikanna.