Körfuknattleikskonan Berglind Gunnarsdóttir, sem slasaðist alvarlega í rútuslysi 10. janúar síðastliðinn, studdi lið sitt til sigurs í Kópavogi í dag.
Körfuknattleiksdeild Snæfells birti mynd af Berglindi ásamt Snæfellsliðinu eftir leikinn í kvöld, þar sem Snæfellskonur lögðu Breiðablik 91:77.
Í færslu körfuknattleiksdeildarinnar segir að heimsókn Berglindar á leikinn hafi verið mikilvægt skref og að gott hafi verið fyrir hópinn að finna fyrir kraftinum og samkenndinni.
„Við erum endalaust stolt af Berglindi okkar og hennar fjölskyldu - krafturinn sem við fengum frá þeim var stórkostlegur! Við höldum áfram að berjast fyrir ykkur!“