Hin bandaríska Simone Biles, besta fimleikakona heims og fjórfaldur ólympíumeistari, gæti verið hætt keppni. Viðurkenndi hún í samtali við Wall Street Journal að þátttaka hennar á Ólympíuleikunum í Tókýó væri í óvissu, nú þegar þeim hefur verið frestað um eitt ár.
Biles hefur æft stíft síðustu mánuði í undirbúningi fyrir leikana, en þeir áttu að fara fram í sumar. Bjuggust flestir við að hún myndi verja ólympíumeistaratitilinn. Ætlaði Biles að hætta eftir leikana, en nú er óljóst hvort hún mætir til keppni í Tókýó.
„Ég hef ekki ákveðið neitt enn þá,“ sagði Biles. Hefur hún áður talað um álagið sem fylgir því að vera í fremstu röð í íþróttinni í áraraðir og að líkaminn sé búinn að fá nóg.
Þá vill hún komast frá bandaríska fimleikasambandinu, þar sem sambandið hefur ekki enn framkvæmt sjálfstæða rannsókn á kynferðisbrotum læknisins Larrys Nassars. Braut Nassar á Biles og yfir 100 öðrum fimleikakonum og var dæmdur í lífstíðarfangelsi fyrir vikið.
Sambandið sættist á að greiða samtals 215 milljónir bandaríkjadala í skaðabætur, sem varð á endanum til þess að sambandið varð gjaldþrota árið 2018.