Vaknaður úr dái eftir svakalegan árekstur (myndskeið)

Hollenski hjólreiðamaðurinn Fabio Jakobsen er kominn úr dái og ekki í lífshættu eftir svakalegan árekstur í keppninni Tour de Poland sem fer fram nú um helgina.

Jakobsen var að berjast um forystuna á endaspretti fyrsta hluta keppninnar þegar keppinauturinn Dylan Groenewegen klessti á hann með agalegum afleiðingum. Hann gekkst undir mikla aðgerð á andliti sem tók fimm klukkustundir og var honum haldið í öndunarvél fyrst um sinn eftir áreksturinn en BBC segir frá.

Liðið hans, Deceuninck-Quickstep, hefur sent frá sér tilkynningu og sagt að þótt líðan Jakobsens sé stöðug eigi hann í vændum langa og stranga endurhæfingu. Groenewegen hefur tímabundið verið leystur frá liði sínu á meðan atvikið er rannsakað. Myndskeið af árekstrinum má sjá hér að neðan en klippan er þó ekki fyrir viðkvæma.

• Blogga um frétt