Undanþága Djokovic vegna smits – mætti smitaður á viðburð með börnum

Lögfræðingar serbneska tennisleikarans Novak Djokovic segja hann hafa fengið undanþágu frá kröfu um að vera bólusettur við kórónuveirunni til þess að geta keppt á Opna ástralska mótinu þar sem hann hafi smitast af veirunni skömmu fyrir jól.

Djokovic, sem hefur ekki viljað þiggja bólusetningu, var búinn að fá undanþágu frá Victoria-ríki í Ástralíu og Tennissambandi Ástralíu til þess að keppa á mótinu en var þrátt fyrir það ekki hleypt inn í landið þegar hann lenti þar í vikunni.

Lögfræðingar Djokovic segja að tennissambandið hafi veitt honum tímabundna vegabréfsáritun þar sem hann hafi fengið „læknisfræðilega undanþágu frá bólusetningu við kórónuveirunni.“

Á miðvikudag sagði í yfirlýsingu frá landamæraeftirliti Ástralíu að tennisleikarinn hafi ekki sýnt fram á viðunandi sönnunargögn á flugvellinum í Melbourne þar sem fyrra smit væri ekki gild ástæða fyrir því að koma inn í landið óbólusettur.

Scott Morrison, forsætisráðherra Ástralíu, staðfesti að slíkar væru alríkisreglurnar þar í landi og því hafi það gilt einu að Victoria-ríki og Tennissamband Ástralíu hafi veitt honum undanþágu.

Hvergi var búið að tilkynna um það áður en Djokovic ferðaðist til Ástralíu að hann hafi smitast í síðasta mánuði.

Þá er athyglisvert að samkvæmt lögfræðingum hans greindist Djokovic smitaður þann 16. desember síðastliðinn en líkt og Ben Rothenberg, blaðamaður New York Times, bendir á á twitteraðgangi sínum mætti hann hins vegar grímulaus á viðburð með fjölda barna í Tennismiðstöð Novaks í Belgrad þann 17. desember.

Djokovic hefði samkvæmt því átt að vera í einangrun enda með virkt smit þegar hann sat fyrir á ljósmyndum með fjölda barna.

Þá rann frestur til þess að sækja um undanþágu hjá Tennissambandi Ástralíu út viku fyrr, þann 10. desember.

• Blogga um frétt