Tiger Woods mun spila á Opna mótinu, einu af risamótum hvers árs í golfheiminum, í fyrsta skipti síðan árið 2015 í ár. Mótið fer fram á Carnoustie-vellinum í Skotlandi og spilar Woods á vellinum í fyrsta skipti síðan árið 2007.
Mótið hefst á fimmtudaginn og stendur til sunnudags og er Haraldur Franklín Magnús á meðal kylfinga á mótinu. Hann er fyrsti Íslendingurinn sem keppir á risamóti í karlaflokki. Woods segir að völlurinn sé einn sá erfiðasti sem kylfingar fá að kynnast.
„Ég hef saknað þess að spila á Opna mótinu því þetta er elsta mótið af þeim öllum," sagði Woods við fjölmiðlamenn í gær. Þetta er elsta mótið í allri íþróttinni og ég hef unnið það nokkrum sinnum, það er skemmtilegt."
„Það er sérstakt að koma á Carnoustie-völlinn. Ég mun spila á honum í fjórða skiptið og það er ótrúlegt hvað þessi völlur breytist ekki neitt. Hann er enn einn sá erfiðasti sem hægt er að spila á," sagði Woods.