Birgir Leifur Hafþórsson lék annan hringinn sinn á lokaúrtökumótinu fyrir Evrópumótaröðina í golfi á 69 höggum eða tveimur höggum undir pari og er hann samanlagt á sjö höggum undir pari eftir tvo hringi af sex.
Íslenski kylfingurinn er í 25.-34. sæti, níu höggum frá Spánverjanum David Borda sem er í forystu á 16 höggum undir pari. Hann lék stöðugt og gott golf í dag og fékk fjóra fugla, tvo skolla og tólf pör.
Tveir vellir eru notaðir í lokamótinu sem fram fer í Tarragona í Katalóníu. Birgir hefur nú leikið báða vellina og í báðum tilfellum undir 70 höggum.
Efstu 25 kylfingarnir að loknum öllum sex hringjum mótsins fá þátttökurétt á Evrópumótaröðinni.