Atvinnukylfingurinn Tiger Woods hefði verið klár í slaginn og tilbúinn að verja titilinn á Masters-mótinu í Augusta í Bandaríkjunum en mótið átti að fara fram í þessari viku.
Mótinu var aflýst, eins og flestöllum stórum íþróttaviðburðum, vegna kórónuveirunnar og skrifaði Tiger á samfélagsmiðla á dögunum að margt væri mikilvægara en golf. „Það er fjölmargt í lífinu sem er mikilvægara en einhver golfmót þessa stundina. Við verðum að vera örugg, klár og gera það sem er rétt fyrir okkur sjálf, ástvini okkar og samfélag," skrifaði hann á Twitter.
Tiger hefur ekki keppt síðan 16. febrúar vegna meiðsla og þurfti að draga sig úr keppni á tveimur mótum en í viðtali við GolfTV sagði hann að heilsan væri miklu betri og að hann hefði verið klár í slaginn á Masters.
„Mér líður miklu betur og ég er tilbúinn en ástandið er eins og það er,“ sagði Tiger. „Það er ekki svona sem ég hefði viljað halda jakkanum en við gætum haldið Masters-mótið í nóvember og ég verð þar, tilbúinn að verja titilinn.“