Kristianstad varð í dag sænskur meistari í handknattleik karla fjórða árið í röð eftir að hafa unnið Malmö í æsilegum og framlengdum úrslitaleik, 23:22, í Scandinavium íþróttahöllinni í Gautaborg. Ólafur Andrés Guðmundsson, fyrirliði Kristianstad, tók þar með við meistarabikarnum í leikslok sem var vel við hæfi en hann þótti vera besti maður liðsins í úrslitaleiknum.
Þetta er í þriðja sinn sem Ólafur verður sænskur meistari með Kristianstad. Hann skoraði fimm mörk í dag og var einu sinni vísað af leikvelli. Arnar Freyr Arnarsson skoraði eitt mark. Gunnar Steinn Jónsson skoraði ekki mark í leiknum og kom ekki mikið við sögu.
Kristianstad var með yfirhöndina í leiknum ef undan eru skildar upphafsmínúturnar. Meistararnir voru með þriggja marka forskot að loknum fyrri hálfleik, 11:8. Malmö nálgaðist Kristianstad snemma í síðari hálfleik og eftir það var leikurinn í járnum. Eftir venjulegan leiktíma var staðan jöfn, 20:20, en Anton Blickhammar jafnaði metin fyrir Malmö 80 sekúndum fyrir lok venjulegs leiktíma.
Vart mátti á milli liðanna sjá í framlengingunni en það voru þó leikmenn Kristianstad sem náðu að kreista úr sigur.