Harpa til Danmerkur

Handknattleikskonan Harpa Sólveig Brynjarsdóttir sem leikið hefur með liði Selfyssinga undanfarin ár er gengin í raðir danska B-deildarliðsins Vendsyssel.

Harpa er 22 ára gömul og skoraði 58 mörk í 21 leik með Selfyssingum í Olís-deildinni á síðustu leiktíð. Hún er unnusta landsliðsmannsins Ómars Inga Magnússonar sem leikur með Aalborg og varð danskur meistari með því á tímabilinu. Ómar gerði í síðasta mánuði fjögurra ára samning við þýska 1. deildarliðið Magdeburg og gengur í raðir þess á næsta ári.

Harpa mun samhliða handboltanum leggja stund á nám í Álaborg.

„Ég hlakka til að spila með Vendsyssel og vera hluti af frábærum hópi. Þetta verður spennandi tímabil með liði sem samanstendur af mörgum góðum leikmönnum. Ég hef trú á því að við munum spila góðan handbolta og vinna marga leiki,“ segir Harpa á vef Vendsyssel.

• Blogga um frétt