Stefán Arnarson, þjálfari kvennaliðs Fram í handknattleik, hefur framlengt samning sinn við félagið til tveggja ára.
Stefán tók við þjálfun Fram-liðsins af Halldóri Jóhanni Sigfússyni árið 2014 en Stefán þjálfaði kvennalið Vals í sex ár og undir hans stjórn varð Valur fjórum sinnum Íslandsmeistari og þrisvar sinnum bikarmeistari.
Stefán hefur svo safnað fleiri titlum í þjálfaratíð sinni hjá Fram. Liðið varð Íslandsmeistari undir hans stjórn árið 2017 og varð bæði Íslands- og bikarmeistari í fyrra.
Á síðustu leiktíð tapaði Fram fyrir liði Vals í úrslitaeinvíginu um Íslandsmeistaratitilinn og einnig í úrslitaleiknum í Coca Cola-bikarnum.