Íslenska U21 árs landslið karla í handknattleik heldur á morgun út til keppni á heimsmeistaramótinu sem haldið er á Spáni.
Liðið stoppar stutt í Hollandi áður en það heldur áfram til Spánar, en liðið á að vera komið á áfangastað um klukkan 22 á mánudag. Aðeins 12 tímum síðar er svo komið að fyrsta leik í riðlinum, gegn Síle, að því er fram kemur á íþróttasíðum Morgunblaðsins í dag.
„Markmiðið er í það minnsta að ná besta árangrinum í nokkur ár. Það hefur ekkert U21 árs lið Íslands komist í átta liða úrslit, svo það er fyrsta markmið þó að stefnan sé alltaf sett á að fara alla leið,“ segir Elliði Snær Viðarsson, fyrirliði íslenska liðsins, í samtali við Morgunblaðið á æfingu landsliðsins þar sem það undirbjó sig fyrir mótið.
Ísland er í ógnarsterkum riðli, en auk Síle eru þar Argentína og Evrópuliðin Danmörk, Noregur og Þýskaland. Ísland leikur fimm leiki á sjö dögum og verða einu frídagarnir í riðlinum á fimmtudag og á sunnudag eftir viku. Lokaleikurinn í riðlinum verður gegn Þýskalandi mánudaginn 20. júlí, en efstu fjögur liðin í riðlinum komast áfram í 16 liða úrslit.