Krefjandi og skemmtilegt verkefni

„Það er alveg ljóst að við erum að fara að mæta einu af besta liði Svíþjóðar svo þetta verður krefjandi en jafnframt skemmtilegt verkefni,“ sagði Ágúst Jóhannsson þjálfari Íslands- og bikarmeistara Vals í handbolta kvenna við mbl.is þegar leitað var eftir viðbrögðum hans um dráttinn í EHF-keppninni þar sem Valur mætir sænska liðinu Skuru. Eva Björk Davíðsdóttir landsliðskona  gekk á dögunum til liðs við Skuru.

„Mér líst ágætlega á þennan drátt en ég veit að Skuru er með gott lið. Það varð deildarmeistari og komst alla leið í úrslitin um meistaratitilinn. Ég veit að það hefur misst tvo til þrjá leikmenn en er búið að fá nýjan línumann og svo auðvitað Evu Björk á miðjuna. Þetta verður erfitt verkefni en það verður gaman að mæla sig við eitt besta lið Svíþjóðar.

Fyrirfram er Skuru sigurstranglegra liðið í þessu einvígi en ef við náðum toppleikjum og náum að gera vel í fyrri leiknum á útivelli er aldrei að vita nema við getum komið á óvart,“ sagði Ágúst.

Fyrri leikur liðanna fer fram 7. eða 8. september og síðari leikurinn verður í Origo-höllinni viku síðar.

• Blogga um frétt