Mikkel Hansen og Henrik Toft Hansen, leikmenn franska meistaraliðsins Paris SG, hafa neyðst til þess að draga sig út úr danska landsliðshópnum í handknattleik fyrir Gullmótið sem hefst í Danmörku í næstu viku.
Báðir leikmennirnir eru að glíma við afleiðingar eftir að hafa fengið heilahristing. Mikkel hefur verið frá keppni í rúman mánuð eftir að hafa fengið heilahristing á æfingu Parísarliðsins en Henrik Toft fékk heilahristing í leik með Paris SG gegn Chambéry í frönsku 1. deildinni í síðustu viku.
Nikolaj Jacobsen, þjálfari heimsmeistara Dana, hefur í staðinn valið þá Lasse Møller úr GOG og Magnus Saugstrup. Á mótinu mæta Danir liðum Norðmanna, Frakka og Spánverja.
Danir leika í riðli með Íslendingum á Evrópumótinu sem haldið verður í Svíþjóð, Austurríki og í Noregi í janúar. Riðill Íslands verður spilaður í Malmö í Svíþjóð.