HK gerði sér lítið fyrir og vann magnaðan 31:24-útisigur á Íslandsmeisturum Vals í Olísdeild kvenna í handbolta í gær. HK var með 17:14-forystu í hálfleik, en Valskonur komust yfir í seinni hálfleik.
Bjuggust þá flestir við að meistararnir myndu sigla heim góðum sigri, en HK-ingar voru á öðru máli og tryggðu sér glæsilegan sigur með ótrúlega góðum lokakafla.
Díana Kristín Sigmarsdóttir skoraði 10 mörk fyrir HK, Valgerður Ýr Þorsteinsdóttir skoraði 7 og Jóhanna Margrét Sigurðardóttir var með 6 mörk.
Lovísa Thompson skoraði 7 mörk fyrir Val og þær Díana Dögg Magnúsdóttir og Ásdís Þóra Ágústsdóttir skoruðu 4 mörk hvor.
Er um fyrsta tap Vals í deildinni á leiktíðinni að ræða og er liðið búið að missa efsta sæti deildarinnar til Framara. HK hefur komið mikið á óvart og er liðið komið upp að hlið KA/Þórs í fjórða sæti. HK getur alveg barist um sæti í úrslitakeppninni. Umræðan síðustu vikur hefur verið á þá leið að Valur og Fram séu ósnertanleg í kvennahandboltanum hér á landi. HK er á öðru máli.
Sjá allt um Olís-deild kvenna á íþróttasíðum Morgunblaðsins í dag