„Höfum ekki farið svona langt niður“

Grímur Hergeirsson, þjálfari Selfyssinga í Olís-deild karla í handknattleik, sagði sitt lið hafa átt verstu spretti sína hingað til í deildakeppninni í haust þegar Selfoss tapaði fyrir Haukum 36:29 á Ásvöllum. 

Frétt af mbl.is

Haukar taplausir á toppnum

„Þetta var engan veginn nógu gott. Við höfum ekki farið svona langt niður í vetur,“ sagði Grímur þegar mbl.is spjallaði við hann á Ásvöllum. Að loknum fyrri hálfleik munaði þremur mörkum á liðunum en Haukar slitu sig endanlega frá Selfyssingum á síðustu tólf mínútunum. 

„Við gáfum bara eftir og vorum bara á hælunum í rauninni í vörninni. Við vorum auk þess óskynsamir í sókninni og það kostar á móti svona liði. Síðasta korterið vorum við gersamlega á hælunum. Við þurfum að fara aðeins í naflaskoðun. En við eigum leik á sunnudag og þá er kjörið tækifæri fyrir menn að svara þessu.“

Selfoss er með 11 stig eftir níu leiki eins og FH og eru þau í 4. og 5. sæti. „Ég er sáttur við margt sem af er í upphafi móts. Haukar eru með topplið og það er ekki auðvelt að koma hingað á þeirra heimavöll. Maður reiknar svo sem ekki með því að taka með sér tvö stig héðan. En á meðan við vinnum þá leiki sem við eigum að vinna þannig séð, á móti liðum sem eru fyrir neðan okkur, þá erum við á þokkalegu róli. Mikið er eftir af mótinu og við ætlum að telja upp úr pokanum þegar vorar og sjá hvað það færir okkur,“ sagði Grímur Hergeirsson ennfremur. 

Grímur Hergeirsson Ljósmynd/Guðmundur Karl

• Blogga um frétt