Alþjóðahandknattleikssambandið, IHF, tilkynnti í dag að Hesham Nasr, forseti egypska handknattleikssambandsins, hefði verið settur í bann frá öllum afskiptum af íþróttinni vegna brota á sóttvarnareglum.
Egyptar héldu heimsmeistaramót karla í janúarmánuði og þar varð Nasr uppvís að því að brjóta reglurnar hvað eftir annað.
Á heimasíðu IHF kemur fram að Nasr hafi strax á opnunarhátíðinni 13. janúar farið á milli sóttvarnasvæða.
Tveimur dögum síðar hafi hann hitt fulltrúa sendiráðs Grænhöfðaeyja og farið á milli sóttvarnasvæða í keppnishöllinni á leik Ungverjalands og Grænhöfðaeyja.
Hinn 17. janúar hafi Nasr verið tilkynnt formlega um brot hans á sóttvarnareglum, ásamt því að hann hefði tekið á móti gestum sem ekki hefðu tilheyrt sóttvarnasvæðinu, m.a. þingmönnum, og farið með þá í gegnum svæðin.
Nasr svaraði IHF bréflega 18. janúar og sagði að hann og allir meðlimir undirbúningsnefndar mótsins hefðu farið að öllum reglum og ávallt farið í skimun ef þeir hefðu hitt einhverja utan sóttvarnakúlu mótsins. Þau próf hefðu ávallt reynst neikvæð.
Þá segir á heimasíðunni að 19. janúar hafi Nasr brotið reglurnar gróflega þrátt fyrir fyrri aðvaranir og vel hefði sést í sjónvarpi þegar hann hafi gengið á milli sóttvarnasvæða á leik Norður-Makedóníu og Síle.
Sagt er að það hafi verið einróma ákvörðun framkvæmdastjórnar IHF að Hisham Nasr skyldi settur í bann frá öllum afskiptum af handknattleik fram að næsta þingi Alþjóðahandknattleikssambandsins.