Geir heiðraður af FH í kvöld

Geir Hallsteinsson, fyrrverandi landsliðsmaður í handknattleik, var heiðraður fyrir leik FH og Aftureldingar í Olísdeild karla í kvöld.

Geir lætur af störfum í íþróttahúsinu í Kaplakrika um áramótin eftir að hafa starfað þar frá opnun þess árið 1990.

Hann varð fyrsti íslenski atvinnumaðurinn í handknattleik þegar hann gekk til liðs við þýska liðið Göppingen árið 1973.

Geir er sannkölluð goðsögn hjá FH þar sem hann vann til fjölda titla og var til að mynda valinn íþróttamaður ársins 1968.

Hann stýrði liðinu einnig til Íslandsmeistaratitils árið 1984 sem þjálfari.

Geir lék alls 118 landsleiki fyrir Íslands hönd og skoraði í þeim 531 mark.