Haukur drjúgur og með fullt hús

Fullkomið tímabil Hauks Þrastarsonar og samherja hans hjá rúmenska liðinu Dinamo Búkarest hélt áfram í kvöld.

Liðið hafði þá betur gegn Eurofarm Pelister frá Norður-Makedóníu á heimavelli í Meistaradeild Evrópu í handbolta. Urðu lokatölur 34:25.

Haukur skoraði fjögur mörk fyrir Dinamo og bætti við fjórum stoðsendingum. Liðið hefur unnið alla leiki sína í deild og Meistaradeild á tímabilinu.

Rúmenska liðið er á toppi A-riðils, ásamt Sporting frá Portúgal, með sex stig eftir þrjá leiki. Orri Freyr Þorkelsson er leikmaður Sporting.

Í sama riðli hafði þýska liðið Füchse Berlin betur gegn Fredricia frá Danmörku á útivelli, 38:32. Einar Þorsteinn Ólafsson skoraði þrjú mörk fyrir Fredericia og Arnór Viðarsson eitt. Guðmundur Þ. Guðmundsson þjálfar liðið, sem er án stiga í riðlinum.

Þá vann Pick Szeged frá Ungverjalandi nauman heimasigur á franska liðinu Nantes, 33:32. Richard Bodo skoraði sigurmarkið einni sekúndu fyrir leikslok. Janus Daði Smárason skoraði eitt mark fyrir heimamenn, sem er í öðru sæti riðilsins með fjögur stig.

• Blogga um frétt