Stjarnan tók á móti Íslands- og deildarmeisturum FH í 4. umferð Íslandsmóts karla í handbolta í kvöld og lauk leiknum með sigri FH 26:22. FH er með 8 stig eftir 5 leiki en Stjarnan er með 4 stig eftir 4 leiki.
Bæði lið voru mjög mistæk i fyrri hálfleik og töpuðu boltanum ítrekað. Voru Stjörnumenn ívið mistækari. Það var lið FH sem skoraði fyrsta mark leiksins úr hraðaupphlaupi eftir misheppnaða sókn Stjörnunnar. FH komst í 2:0 en Stjarnan jafnaði fyrst í stöðunni 2:2. Eftir þetta skiptust liðin á að jafna og komast yfir allt þangað til Hafnfirðingar komust yfir í stöðunni 8:7.
FH hélt þá forskotinu restina af hálfleiknum og skoraði mark á síðustu sekúndu fyrri hálfleiks sem dómararnir þurftu að skoða í skjánum til að meta hvort markið væri gott og gilt. Það reyndist vera svo og fóru Hafnfirðingarnir úr FH með tveggja marka forskot inn í hálfleikinn í stöðunni 12:10.
Markahæstir í liði Stjörnunnar í fyrri hálfleik voru þeir Tandri Már Konráðsson, Jóhannes Björgvin, Hans Jörgen Ólafsson og Jóel Bernburg allir með tvö mörk. Adam Thorstensen átti flottan fyrri hálfleik og varði 11 skot.
Í liði FH var Birgir Már Birgisson með 5 mörk, flest úr hraðaupphlaupum. Daníel Freyr Andrésson varði 3 skot.
FH byrjaði seinni hálfleikinn á að auka muninn í þrjú mörk i stöðunni 13:10. Þann mun náði Stjarnan að minnka niður í eitt mark í stöðunni 15:14 en þá tóku Hafnfirðingar aftur við sér og juku muninn aftur í þrjú mörk og var munurinn 2-3 mörk mest allan seinni hálfleikinn.
Þegar 10 mínútur voru eftir af leiknum tókst Stjörnunni að minnka muninn aftur í eitt mark í stöðunni 20:19 fyrir FH en þann mun juku Hafnfirðingar aftur í tvö mörk úr vítaskoti.
Þegar 5 mínútur voru eftir af leiknum tóku Stjörnumenn leikhlé eftir að Hafnfirðingar höfðu aukið muninn í fimm mörk. Það má segja að vandamál Stjörnumanna í kvöld hafi verið að loka á hornamenn FH því bakverðir Stjörnunnar leituðust mikið við að hjálpa skyttunum að verjast bæði Ásbirni Friðrikssyni og Aroni Pálmarssyni sem galopnaði hornin fyrir FH.
Eftir leikhlé náði lið FH 6 marka forskoti. Þá fór í gang ákveðið kæruleysi hjá liði FH og náðu Stjörnumenn að notfæra sér það og minnkuðu muninn niður í 3 mörk í stöðunni 25:22. Lengra komust Garðbæingar ekki gegn sterku liði FH og lauk leiknum með 4 marka sigri FH 26:22.
Markahæstir í liði Stjörnunnar voru þeir Jóel Bernburg og Hans Jörgen Ólafsson með 5 mörk hvor. Adam Thorstensen var besti maður Stjörnunnar í kvöld með 16 varin skot.
Í lið FH var Birgir Már Birgisson með 10 mörk og varði Daníel Freyr Andrésson 7 skot. FH mætir næst liði Vals í Kaplakrika á fimmtudag en Stjarnan spilar gegn liði Fjölnis á föstudag.