Eins og 100 metra hlaup

Það hefur vakið furðu margra knattspyrnuáhugamanna að Leroy Sané hlaut ekki náð fyrir augum Joachim Löw landsliðsþjálfara Þjóðverja í knattspyrnu þegar hann valdi lokahópinn sem leikur á HM í sumar.

Sané átti frábært tímabil með Englandsmeisturum Manchester City og var útnefndur besti ungi leikmaðurinn í deildinni. Löw segir að valið hafi staðið á milli Sané og Julian Brandt leikmanns Bayer Leverkusen og á endanum hafi hann ákveðið að velja Brandt.

„Þetta var mjög erfið ákvörðun en Leroy er mikið efni og hann verður með okkur aftur í september. Þetta var eins og 100 metra hlaup þar sem Brandt var hársbreidd á undan,“ sagði Löw á fréttamannafundi í dag.

Sané hefur verið gagnrýndur fyrir frammistöðu sína með þýska landsliðinu en honum hefur hvorki tekist að skora né leggja upp í þeim 12 leikjum sem hann hefur spilað með. Hann skoraði hins vegar 14 mörk og gaf 19 stoðsendingar með Manchester City í öllum keppnum á leiktíðinni.

Ekki er útilokað að Sané verði með á HM. Ef einhver sóknarmaður meiðist fyrir fyrsta leikinn þá getur Löw skipt út leikmanni sólarhring fyrir fyrsta leikinn sem er gegn Mexíkó þann 17. júní.

• Blogga um frétt