Luka Modric er skærasta stjarna króatíska landsliðsins sem verður síðasti mótherji Íslands í riðlakeppninni á HM í Rússlandi.
Modric vann Meistaradeildina með Real Madrid þriðja árið í röð í síðasta mánuði og var síðustu helgi krýndur knattspyrnumaður ársins í Króatíu sjötta árið í röð.
„Frábær úrslit með landsliðinu er það eina sem ég vil enn ná og fyrsta markmið okkar er að komast upp úr riðlinum og fara í sextán liða úrslitin. Það hefur okkur ekki tekist síðan 1998 en ég tel að við munum ná því hér í Rússlandi,“ segir Modric sem á að baki 106 leiki með króatíska landsliðinu og hefur í þeim skorað 12 mörk.
Króatar mæta Nígeríumönnum í Kaliningrad á laugardaginn en Króatar og Íslendingar eigast við í Rostov 26. júní.