Fór úr axlarlið á skokki

Gareth Southgate landsliðsþjálfari Englands getur ekki stokkið upp og fagnað mörkum í næstu leikjum á sama hátt og hann gerði í sigurleik liðsins gegn Túnis á HM í Rússlandi í Volgograd í vikunni.

Southgate fór út að skokka í nágrenni dvalarstaðs enska landsliðsins í Repino í Rússlandi í morgun og þá vildi ekki betur til en svo að hann hrasaði og fór úr axlarlið.

„Læknirinn segir að það komi ekki til greina að ég fagni með sömu tilþrifum á næstunni. En það var betra að það var ég sem lenti í einhverju svona, frekar en einhver leikmannanna okkar," sagði Southgate við BBC í dag.

Englendingar mæta Panama í Nishnij Novgorod á sunnudaginn.

• Blogga um frétt