Þýski hornamaðurinn Tobias Reichmann verður ekki meira með á HM í handknattleik sem fram fer í Egyptalandi en hann er meiddur á hné eftir leik Þýskalands gegn Úrúgvæ í fyrstu umferðinni.
Alfreð Gíslason er þjálfari Þjóðverja en hann hefur kallað línumanninn Patrick Wiencek, sem spilar með Kiel í heimalandinu, inn í hópinn í stað Reichmanns sem spilar með þýska liðinu Melsungen sem Guðmundur Þórður Guðmundsson, landsliðsþjálfari Íslands, stýrir.
Þjóðverjar fengu ódýr stig í keppninni í dag því Grænhöfðaeyjar geta ekki teflt fram tíu leikmönnum, sem er lágmarkið, vegna fjölda kórónuveirusmita í þeirra röðum. Alls eru 13 leikmenn af 22 hjá þeim greindir með smit og þar með endar leikurinn 10:0 fyrir Þýskaland. Þjóðverjar eru þar með komnir með fjögur stig og formlega búnir að tryggja sér sæti í milliriðlakeppni mótsins.