Bjarki Már Elísson var á meðal þeirra sem var gagnrýndur af blaðamanni Kristianstadsbladet fyrir að mæta ekki í viðtal hjá miðlinum eftir tapið gegn Ungverjum á HM í handbolta í gærkvöldi.
Hornamaðurinn sá spauglegu hliðina þegar liðið ræddi við blaðamenn í dag og bað sérstaklega um að fá að spjalla við blaðamenn frá Svíþjóð. Þegar það gekk ekki á ensku, reyndi hann fyrir sér í sænskunni, en enginn sænskur blaðamaður bauð sig fram.
„Eru einhverjir blaðamenn hérna frá Svíþjóð?“ kallaði Bjarki fyrst á ensku og svo sænskunni, en lítið var um svör.
„Bjarki Már Elísson fór í skylduviðtölin við sjónvarpsstöðvarnar en eftir að hafa litið snögglega yfir afganginn af fréttamönnunum braut hann reglur IHF og fór aftur inn í búningsklefann án þess að fara í gegnum fréttamannasvæðið,“ skrifaði blaðamaðurinn m.a eftir leikinn í gær.