Körfuknattleiksdeild Þórs á Akureyri hefur samið við framherjann Jamal Smith og mun hann leika með liðinu í vetur. Kemur hann í staðinn fyrir Rowan Bell sem félagið hafði áður samið við en samningi Bell var rift á dögunum.
Smith er með bæði bandarískt og hollenskt ríkisfang, en hann hefur leikið í Belgíu, Kína, Hollandi, Ítalíu og Þýskalandi síðustu ár. Skoraði hann að meðaltali 14 stig og gaf eina stoðsendingu í hverjum leik með Düsseldorf í þýsku B-deildinni tímabilið 2018 til 2019.
Er Smith væntanlegur til landsins í dag, eins og leikstjórnandinn Dedric Basile. Lið Þórs verður nokkuð breytt frá síðustu leiktíð en félagið réð Bandaríkjamanninn Andrew Johnson sem þjálfara eftir síðasta tímabil.
Var Þór í fallsæti þegar síðasta tímabili var aflýst en slapp með skrekkinn og hélt sæti sínu í deildinni þar sem ákveðið var að aðeins eitt lið myndi falla úr deildinni.