Donovan Mitchell skoraði 28 stig fyrir Utah Jazz þegar liðið lagði New Orleans Pelicans í Utah í bandarísku NBA-deildinni í körfuknattleik í nótt.
Leiknum lauk með 118:102-sigri Utah en þetta var sjötti sigur liðsins í röð
Mikið jafnræði var með liðunum í fyrri hálfleik og Utah leiddi með sex stigum í hálfleik 55:49.
Í þriðja leikhluta skoraði Utah 36 stig gegn 20 stigum New Orleans og New Orleans tókst aldrei að koma til baka eftir það.
Utah er í þriðja sæti Vesturdeildarinnar með tíu sigra en New Orleans er í tólfta sætinu með fimm sigra.
Þá átti Serbinn Nikola Jokic enn einn stórleikinn fyrir Denver Nuggets þegar liðið vann öruggan 119:101-sigur gegn Oklahoma City Thunder í Denver.
Jokic var með tvöfalda tvennu, skoraði 27 stig og tók tólf fráköst. Þá gaf hann einnig sex stoðsendingar en Denver er í níunda sæti Vesturdeildarinnar með sjö sigra.
Oklahoma hefur hins vegar ekki gengið vel á tímabilinu en liðið er í ellefta sæti Vesturdeildarinnar með sex sigra.
Úrslit næturinnar í NBA:
Denver Nuggets 119:101 Oklahoma City Thunder
Utah Jazz 118:102 New Orleans Pelicans