NBA-lið Brooklyn Nets í körfuknattleik hefur gefið það út að stórstjarnan Kevin Durant muni ekki skipta um lið fyrir næsta tímabil þrátt fyrir að hafa óskað eftir skiptum í upphafi sumars.
Durant hefur verið þráfaldlega verið orðaður við skipti til LA Lakers en eftir fund í Los Angeles í gær er ljóst að ekkert verður af þeim.
Sean Marks, framkvæmdastjóri félagsins, sagði í yfirlýsingu að náðst hafi samkomulag um að halda samstarfinu áfram.
„Ég og Steve Nash [þjálfari Brooklyn] ásamt Joe Tsai og Clara Wu Tsai [eigendur Brooklyn] hittum Kevin Durant og Rich Kleiman [umboðsmaður Durants] í Los Angeles í gær.
Við höfum tekið ákvörðun um að halda samstarfi okkar áfram. Við einbeitum okkur að körfubolta með eitt sameiginlegt markmið í huga: að byggja upp sterkt félag sem endist í því skyni að skila meistaratitlinum til Brooklyn,“ sagði Marks.
Durant, sem er 34 ára gamall, er samningsbundinn Brooklyn til næstu fjögurra ára.