Körfuknattleiksdeild Breiðabliks hefur gengið frá samningi við landsliðskonuna Isabellu Ósk Sigurðardóttur og mun hún leika með liðinu á komandi leiktíð.
Isabella var lykilmaður hjá Breiðabliki á síðustu leiktíð og skoraði þá 14,4 stig, tók 13,8 fráköst og gaf 2,4 stoðsendingar að meðaltali í leik. Hún átti stóran þátt í að Breiðablik fór alla leið í bikarúrslit.
Eftir tímabilið fór Isabella til Ástralíu að leika fyrir South Adelaide Panthers í B-deildinni þar sem henni gekk vel. Þrátt fyrir það hefur hún ákveðið að snúa aftur heim í Smárann.
Isabella er 25 ára gömul og leikur sem miðherji en hún á að baki átta A-landsleiki fyrir Íslands hönd.