Bandaríska kvennalandsliðið í knattspyrnu hafði betur gegn því ástralska í leik liðanna um bronsverðlaunin á Ólympíuleikunum í Tókýó í morgun. 4:3 urðu lokatölur í stórskemmtilegum fótboltaleik.
Vængmaðurinn þaulreyndi, Megan Rapinoe, fór fyrir bandaríska liðinu og kom því í forystu strax á áttundu mínútu leiksins.
Markahrókurinn Sam Kerr jafnaði metin fyrir Ástralíu skömmu síðar, á 17. mínútu, áður en Rapinoe skoraði aftur aðeins fjórum mínútum síðar.
Annar reynslubolti, Carli Lloyd skoraði svo þriðja mark Bandaríkjakvenna í uppbótartíma fyrri hálfleiks og staðan því 3:1 í leikhléi eftir frábæran fyrri hálfleik.
Lloyd skoraði sitt annað mark snemma í síðari hálfleik, á 51. mínútu og aðeins þremur mínútum síðar minnkaði Caitlin Foord muninn fyrir Ástralíu.
Staðan orðin 4:2 eftir aðeins 54 mínútur.
Ástralir náðu svo að skora sárabótarmark í uppbótartíma venjulegs leiktíma þegar Emily Gielnik komst á blað.
Markið kom hins vegar of seint og sigur Bandaríkjanna því staðreynd sem þýðir að bronsverðlaunin falla þeim í skaut.