Ótrúlegur vaxtarhraði urriða

Í ánni Testebo í Svíþjóð er svokallaður riverwatcher fiskiteljari með myndavél frá íslenska þekkingarfyrirtækinu Vaki þar sem lengd fisksins er mæld með mikilli nákvæmni.

Greint er frá ferðum sjóbirtings sem fór í gegnum teljara árinnar hinn 13. júní 2017 á leið niður ána. Var hann reiknaður 77 cm á lengdina og var þá horaður og ræfilslegur á leið til sjávar á fæðuslóðir í Eystrasalti eftir vetursetu í ánni. Þegar hann kom til baka fimmtíu og einum degi síðar, 3. ágúst, var hann búinn að lengjast um 12 cm og orðinn 89 cm og gríðarlega gildur um sig.

Samkvæmt upplýsingum frá fyrirtækinu þá telur riverwatcher fiska með 95% nákvæmni og mælir sjálfkrafa stærð allra fiska sem ganga þar í gegn með 98% nákvæmni, auk þess sem myndskeið er tekið af hverjum fiski sem þar er á ferð. Þá gerir svokölluð Pit-Tag-tækni mönnum nú einnig kleift að auðkenna sama einstaklinginn með 100% nákvæmni. 

Sami urriðinn á leið niður ána eftir vetursetu þann 13. júní. Vaki

• Blogga um frétt

Seinustu hundraðkallar sumarsins