Veiking krónunnar eða lenging lána

Á síðasta ári var mjög heilbrigður hagvöxtur sem var drifinn áfram af útflutningi, en á næstu árum er líklegt að það verði innlend eftirspurn sem verði helsti áhrifavaldurinn í hagvexti. Slíkt skapar ekki gjaldeyri á komandi árum og mun leiða til þess að ómögulegt verður að greiða af erlendum lánum og við ílengjumst í höftum. Þetta segir Ásdís Kristjánsdóttir, forstöðumaður efnahagssviðs Samtaka atvinnulífsins, en samtökin kynntu nýja hagvaxtarspá í dag.

„Við sjáum fram á að samsetning hagvaxtar muni breytast verulega á komandi árum,“ segir Ásdís, en hún telur það áhyggjuefni að gjaldeyrisafgangurinn sé að minnka. Haldi áfram sem horfir, með aukinni einkaneyslu og í kjölfarið ójafnvægi í viðskiptajöfnuði, þá séum við komin í gamalt far verðbólgu og eignabólu. Segir hún að meðan við séum innan hafta og með krónueignir í höndum erlendra aðila sem vilji úr landi þá skapi slíkt aðstæður þar sem erfitt verður að afnema höftin. 

Afborgunarferill erlendra lána er mjög þungur hjá íslenskum aðilum á næsta ári og segir Ásdís að við því þurfi að bregðast. Telur hún mikilvægt að ná að lengja í erlendum lánum eða endurfjármagna. „Annars mun krónan þurfa að veikjast,“ segir hún. 

Ásdís telur að umfang skuldaleiðréttinganna gefi ekki tilefni til mikilla áhrifa á efnahagskerfið, en að tímasetning þeirra, þegar spennan sé mikil, geti aukið umfangið mun meira en tilefni gefi til. 

• Blogga um frétt