Gert er ráð fyrir að gömlu innréttingarnar í Fatabúðinni að Skólavörðustíg 21 verði hluti af veitingastaðnum Krua Thai að sögn Orra Árnasonar, arkitekts hjá Zeppelin arkitektum, sem sér um endurskipulagningu húsnæðisins. „Það var tekin ákvörðun um að reyna halda eins mikið í innréttingarnar og hægt væri og gera þeim hátt undir höfði,“ segir Orri.
Mbl greindi frá því í nóvember að Sonja Lampa, eigandi veitingastaðarins Krua Thai, hefði fest kaup á húsinu þar sem hún hyggst opna Krua Thai á jarðhæðinni auk þess sem íbúðum á efri hæðum hússins verður mögulega breytt í gistiheimili. Stefnt er að opnun veitingastaðarins næsta sumar en hann verður á jarðhæðinni þar sem í dag eru verslanirnar Fatabúðin og Insula.
Viðræður hafa þá staðið yfir milli Minjastofnunar og eiganda um verndun innréttinganna sem eru frá árinu 1947.
Orri segir miklar breytingar verða á húsinu á jarðhæð og í kjallara en ytra byrði hússins verður að líkum óbreytt utan mögulegra svala á bakhlið hússins. Hann telur að hönnunarvinnunni muni ljúka á næstunni og vonast til þess að geta lagt tillögurnar inn til byggingarfulltrúa í vikunni.
Þá segist hann ánægður með niðurstöðuna um verndun innréttinganna. „Ég tel að þetta geti komið veitingastaðnum til góðs,“ segir Orri.
Fatabúðin var opnuð í húsinu árið 1927 þegar stofnað var útibú á Skólavörðustíg, en höfuðstöðvar verslunarinnar voru þá í Hafnarstræti 16. Til skamms tíma var verslunin því rekin á báðum stöðum. Verslunin Skyrta er í húsnæðinu í dag en eigendur hennar gerðu innréttingarnar upp er þeir opnuðu.
Fyrsta hæð hússins að Skólavörðustíg 21a var byggð árið 1927 en ofan á húsið var byggt árið 1936. Það var Guðríður Árnadóttir Bramm sem lét byggja húsið en hún stofnaði Fatabúðina og var hún rekin í fjölskyldu hennar allt til 1955. Guðríður var þar að auki þekkt athafnakona og hafði áður rekið verslun á Ísafirði og lét meðal annars byggja stórhýsið Fell þar í bæ sem brann í stórum eldsvoða á fimmta áratugnum.