Auglýsingastofan Árnasynir hefur innleitt hugbúnað í starfsemina sem forprófar auglýsingaefni með aðstoð gervigreindar. Hugbúnaðurinn mælir hvaða þætti auglýsingaefnisins augun grípa fyrst og bendir á leiðir til úrbóta ef þörf er á.
„Við byrjuðum að prófa hugbúnaðinn í haust og hann hefur gefið það góða raun að nú höfum við innleitt hann sem fastan part af vinnuferlinu. Hann byggir að nokkur þúsund augnskannarannsóknum þar sem mælt var hvert athyglin beinist við fyrstu sýn,“ segir Hrönn Óskarsdóttir, framkvæmdastjóri Árnasona.
Hugbúnaðinum er beitt á ýmsar gerðir auglýsinga og markaðsefnis, til dæmis prentauglýsingar, heimasíður og umbúðir svo nokkuð sé nefnt. Til þess að mæla virkni markaðsefnis á netinu er t.d. mikið notast við svokallað „A/B test“. Þá eru mismunandi útgáfur af skilaboðum settar í loftið og viðbrögðin borin saman. Hugbúnaðurinn býður hins vegar upp á að framkvæma prófanir áður en auglýsingaefnið fer í loftið og minnka þannig óvissuna áður en haldið er af stað.
Hrönn segir að gervigreind taki ágiskanir út úr myndinni, t.d. þegar kemur að staðsetningu meginskilaboða, litasamsetningu og fleiru.
„Hugbúnaðurinn stjórnar aldrei hönnuninni en hjálpar við að fínstilla hana og tryggja að hún skili hámarksárangri þannig að þau skilaboð sem skipta mestu máli sjáist á fyrstu sekúndunum,“ segir Hrönn. “Oft snúast vangavelturnar í hönnunarferlinu um hvort nota eigi þennan lit eða hinn, hafa þessi skilaboð meira áberandi og svo mætti lengi telja. Hingað til hafa menn yfirleitt þurft að treysta á smekk og reynslu þegar kemur að slíkum ákvörðunum en nú er búið að útrýma þeim óvissuþætti að stóru leyti. Forritið tryggir að þau skilaboð sem við viljum setja í forgrunn og fangi athyglina geri það í raun og veru."
Hún tekur dæmi um að hugbúnaðurinn greini hvort að aukaatriði fái of mikið vægi í kynningarefninu. „Þá þarf að dempa litinn, breyta staðsetningu eða fikta í forminu svo að aukaatriðin fangi ekki alla athyglina.“
Hrönn segir að Árnasynir séu fyrsta auglýsingastofan á Íslandi til að notast við gervigreind á þennan hátt en hún telur að eftir nokkur ár verði öll hönnunarforrit með innbyggðri gervigreind. “Forprófanir á markaðsefni eru óumdeilanlega mjög gagnlegar en hafa hingað til verið tímafrekar og kostnaðarsamar. Tæknin er að breyta því eins og þetta dæmi sannar."