Nikkei-hlutabréfavísitalan lækkaði um 1,09% í kauphöllinni í Tókýó í dag og lækkuðu hlutabréf í Nissan um rúm 5%. Jafnframt lækkuðu hlutabréf í Mitsubishi en í gær var stjórnarformaður bílaframleiðendanna, Carlos Ghosn, handtekinn grunaður um fjármálamisferli.
Nissan lækkaði um 5,45% og Mitsubishi Motors um 6,84% en lækkunin var mun meiri fyrr í dag. Hlutabréf í franska bílaframleiðandanum Reunault hafa einnig lækkað í kjölfar hneykslismálsins í kringum Ghosn sem stýrði Renault-Nissan-Mitsubishi-bandalaginu.