Ingólfur Hannesson, fyrrverandi deildarstjóri íþróttadeildar RÚV, hefur verið ráðinn til starfa hjá alþjóðlega fjölmiðla- og markaðssetningarfyrirtækinu Infront, sem er með höfuðstöðvar sínar í Sviss.
Infront sér meðal annars um markaðssetningu á sýningarrétti ýmissa íþróttaviðburða og er Ingólfi ætlað að einbeita sér sérstaklega að vetraríþróttum í starfi sínu, samkvæmt fréttatilkynningu á vef fyrirtækisins.
Ingólfur hefur starfað fyrir Samband evrópskra sjónvarpsstöðva (EBU) í sextán ár og haft búsetu í Sviss, en þar hefur hann haft yfirumsjón með sýningarréttarmálum í vetrar- og innanhússíþróttum, sem framkvæmdastjóri íþróttasviðs EBU.
Í fréttatilkynningu er haft eftir Bruno Marty, varaforseta vetraríþróttasviðs Infront, að það sé fengur fyrir fyrirtækið að fá Ingólf til starfa, þar sem hann sé á meðal reyndustu sérfræðinga á sviði sýningarréttar vetraríþrótta.
Þá er haft eftir Ingólfi að í heimi íþrótta og stafrænna miðla þurfi sérsambönd og aðrir rétthafar sýningarréttar á traustum samstarfsaðilum að halda sem geti veitt ýmsa þjónustu sem nái yfir alla virðiskeðjuna. Infront er slíkur aðili að sögn Ingólfs, sem segist hlakka til að taka þátt í framtíðarvelgengni fyrirtækisins.
Hjá Infront starfa yfir 1.000 manns á ýmsum sviðum og fyrirtækið er með skrifstofur í 14 löndum.