Brottfarir erlendra farþega frá landinu um Keflavíkurflugvöll voru 163 þúsund í októbermánuði eða um 36 þúsund færri en í október árið 2018. Fækkun milli ára nemur 18,4%.
Samkvæmt niðurstöðum talninga Ferðamálastofu á skiptingu þjóðerna munar mest um fækkun Bandaríkjamanna, en brottförum þeirra fækkaði um 25 þúsund frá því í október 2018 eða um 42% milli ára.
Fækkun hefur verið alla mánuði frá áramótum. Í janúar nam hún 5,8%, í febrúar 6,9%, í mars 1,7%, í apríl 18,5%, í maí 23,6%, í júní 16,7%, í júlí 17%, 13,5% í ágúst og 20,7% í september.
Bandaríkjamenn voru fjölmennastir í október eða um fimmtungur brottfara en þar á eftir komu Bretar eða um 12,6% af heild. Í þriðja sæti voru brottfarir Kínverja, tæp 10.800 talsins og fjölgaði þeim um 24,3% milli ára. Frá áramótum hafa um 1,7 milljónir erlendra farþega farið frá Íslandi um Keflavíkurflugvöll sem er 14,7% fækkun miðað við sama tímabil í fyrra.
Um 57 þúsund Íslendingar fóru utan í október í ár eða 11% færri en í október 2018. Frá áramótum hafa um 522.600 Íslendingar farið utan eða 7,8% færri en á sama tímabili í fyrra.
Í tilkynningu Ferðamálastofu er vakin athygli á því að frá og með 1. október voru gerðar breytingar á fyrirkomulagi talningar brottfararfarþega eftir þjóðerni á Keflavíkurflugvelli. Í stað handtalningar á öllum farþegum á leið úr landi verður þjóðernasamsetning framvegis metin út frá kerfisbundnu úrtaki.