Íslandsbanki segir að útlit sé fyrir svipaðan fjölda ferðamanna í ár og í fyrra og hóflega fjölgun eftir það. Þá telur bankinn að komið sé að þáttaskilum í ferðaþjónustu þar sem hagræðing og hámörkun virðisauka af hverjum ferðamanni taki við af örum vexti vegna hraðrar fjölgunar ferðamanna. 

Þetta kemur fram í nýrri þjóðhagsspá Íslandsbanka. 

Útlit er fyrir að fjöldi ferðamanna verði svipaður í ár og í fyrra. mbl.is/Kristinn Magnússon

Bankinn segir að ágjöf í ferðaþjónustu snemma á síðasta ári hafi leitt til samdráttar í útflutningstekjum og minni afgangs af þjónustuviðskiptum. „Ferðaþjónusta skilar þó enn þá jafnvirði nærri fjögurra af hverjum tíu krónum í gjaldeyristekjum þjóðarbúsins og ríður baggamuninn um að talsverður afgangur mun væntanlega reynast áfram af utanríkisviðskiptum.“

Frétt af mbl.is

„Kreppan er ekki hér“

Bent er á, að tekjur af erlendum ferðamönnum hafi numið 382 milljörðum kr. á fyrstu 9 mánuðum ársins 2019 sem svari til ríflega 8% samdráttar í krónum talið á milli ára. Á sama tímabili hafi sjávarútvegur skilað alls 192 milljörðum í tekjur og útflutningur á áli 161 milljarði. 

Bankinn telur að komið sé að þáttaskilum í ferðaþjónustu þar sem hagræðing og hámörkun virðisauka af hverjum ferðamanni taki við af örum vexti vegna hraðrar fjölgunar ferðamanna. mbl.is/Kristinn Magnússon

Þá kemur fram, að erlendir ferðamenn hafi verið tæplega tvær milljónir í fyrra og var árið þar með þriðja stærsta ferðamannaárið frá upphafi, þrátt fyrir 14% fækkun ferðamanna milli ára. 

„Útlit er fyrir að fjöldi ferðamanna verði svipaður í ár og í fyrra ef marka má nýlega spá Isavia. Þá er að okkar mati komið að þáttaskilum í ferðaþjónustu þar sem hagræðing og hámörkun virðisauka af hverjum ferðamanni tekur við af örum vexti vegna hraðrar fjölgunar ferðamanna,“ segir í spá bankans. 

„Okkar áætlun hljóðar því upp á u.þ.b. 3% fjölgun ferðamanna á hvoru áranna 2021-2022 sem er í takti við spár um fjölgun ferðamanna á heimsvísu.“

Erlendir ferðamenn voru tæplega tvær milljónir í fyrra og var árið þar með þriðja stærsta ferðamannaárið frá upphafi, þrátt fyrir 14% fækkun ferðamanna milli ára. mbl.is/Árni Sæberg

Tengdar fréttir

Ferðamenn á Íslandi

Mikilvægt að vera á tánum

• Ferðaþjónusta aldrei vegið þyngra í landsframleiðslu
• Innviðir komnir að þolmörkum
• „Var lengi vel eini vinur ferðaþjónustunnar“
• „Hækkun VSK á ferðaþjónustu er þjóðhagslegt óráð“

» Fleiri tengdar fréttir

• Blogga um frétt