Gengi hlutabréfa á helstu mörkuðum tók víða stökk upp á við eftir afar slæman fimmtudag, þann versta í bandarísku kauphöllinni síðan árið 1987.
Við lokun markaða í kvöld hafði S&P 500-vísitalan hækkað um rúmlega níu prósent, sem er mesta hækkun vísitölunnar frá árinu 2008. Hækkun vestanhafs kom að mestu fram í kjölfar þess að Donald Trump Bandaríkjaforseti tilkynnti að hann hefði samið við forstjóra stórra einkafyrirtækja þar í landi um aðstoð við skimanir fyrir kórónuveirunni, en hann lýsti yfir neyðarástandi í Bandaríkjunum í kvöld sökum útbreiðslu kórónuveirunnar.
Yfirlýsingin leysir úr læðingi milljarða bandaríkjadala úr fjárhirslum ríkissjóðs sem nýst geta í baráttunni gegn faraldrinum.