Samkvæmt upplýsingum Þjóðskrár var 355 kaupsamningum um íbúðarhúsnæði þinglýst á höfuðborgarsvæðinu í júní og voru þeir 26% færri en í júní fyrir ári síðan. Þetta kemur fram í Hagsjá Landsbankans. Í öllum sveitarfélögum höfuðborgarsvæðisins mældist samdráttur, nema í Mosfellsbæ og á Seltjarnarnesi þar sem mældist lítilleg aukning.
Maímánuður var nokkuð líflegur á íbúðamarkaði þar sem þinglýsingar voru mun fleiri en í apríl þegar samkomubann stóð sem hæst og sömuleiðis mældist nokkuð skörp hækkun á íbúðaverði milli mánaða. Vísbendingar voru því um að líf væri að færast í íbúðamarkaðinn. Í júní hefur þetta þó róast.
Á meðan samdráttur mælist á höfuðborgarsvæðinu, mælist aukning víða utan þess. Á Akureyri, Akranesi og á Árborgarsvæðinu var alls staðar fleiri kaupsamningum þinglýst á öðrum ársfjórðungi í ár samanborið við sama fjórðung í fyrra. Mest var aukningin á Akranesi þar sem 57% fleiri kaupsamningum var þinglýst, á Akureyri mældist aukning upp á 18%, og 12% á Árborgarsvæðinu.