Kapp ehf hefur keypt véla- og bifreiðaverkstæðið Kistufell ehf. „Þar með er KAPP ehf að styrkja vélarhlutann í starfsemi sinni enn frekar hér á landi,“ að því er segir í tilkynningu.
Guðmundur Ingi Skúlason, framkvæmdastjóri Kistufells og aðaleigandi fyrirtækisins frá árinu 2004, segir í tilkynningunni að söluverðið sé trúnaðarmál. „Fyrirtækið verður rekið áfram með svipuðu sniði og áður og með sama mannskap. Þó er stefnt að því að efla starfsemina með alhliða þjónustu á vélasviði og þá í samvinnu með KAPP,“ segir hann.
„Þessi kaup styrkja þjónustu okkar á innanlandsmarkaði mikið og gera okkur sem heild enn sterkari að sækja fram í okkar starfsemi og þjónustu fyrir viðskiptavini,“ segir Óskar Sveinn Friðriksson, framkvæmdastjóri KAPP.
Vélaverkstæðið Kistufell var stofnað árið 1952 af bræðrunum Guðmundi og Jónasi Jónassonum og sérhæfir sig í vélaviðgerðum á all flestum tegundum af vélum, slípun sveifarása, borun á vélablokkum, þrýstiprófun hedda og samsetningum á vélum. Hjá fyrirtækinu starfa sjö bifvélavirkjar þar af eru tveir bifvélavirkjameistarar.
KAPP sinnir vélaviðgerðum, selur og þjónustar kæli, frysti- og vinnslubúnað ásamt því að framleiða og smíða ryðfríar vörur fyrir matvælaiðnaðinn.