Engar eignir fundust í þrotabúi Nordic Smile ehf. og var því skiptum lokið 24. febrúar 2020 án þess að greiðsla fengist upp í lýstar kröfur. Alls námu lýstar kröfur 127,8 milljónum króna, þar af námu forgangskröfur 29,8 milljónum.
Félagið hóf starfsemi í byrjun árs 2011 og nýtti það sænska aðferð við tannígræðslur, þótti hún nákvæmari og mun ódýrari þegar miðað var við önnur lönd, allt að þriðjungi ódýrara en í Bretlandi og Bandaríkjunum og var stefnt að því að fá erlenda ferðamenn til Íslands í tannígræðslur.
Um 200 viðskiptavinir höfðu leitað til Nordic Smile áður en dyrum fyrirtækisins var lokað í júlí 2011. Með úrskurði héraðsdóms Reykjavíkur uppkveðnum 4. maí 2012 var búið tekið til gjaldþrotaskipta.