Ísland, Noregur, Liechtenstein og Bretland hafa sammælst um að bráðabirgðasamningur um vöruviðskipti taki gildi hafi fríverslunarsamningur ekki verið undirritaður fyrir áramót svo óbreytt viðskiptakjör verði áfram tryggð. Góður gangur er í fríverslunarviðræðunum og er stefnt að því að ljúka þeim á tilsettum tíma.
Þetta kemur fram á vef Stjórnarráðsins.
Þar segir, að fríverslunarviðræður Íslands og hinna EES EFTA-ríkjanna, Noregs og Liechtenstein, við Bretland standi nú yfir og gangi vel, þrátt fyrir að hafa hafist seinna en ráð fyrir gert vegna kórónuveirufaraldursins. Samninganefndir hafa hist reglulega á rafrænum fundum með það að markmiði að ljúka viðræðum tímanlega svo að nýr fríverslunarsamningur geti tekið gildi um áramótin þegar svonefndu aðlögunartímabili lýkur.
„Þrátt fyrir góðan gang í fríverslunarviðræðunum hafa stjórnvöld í ríkjunum fjórum nú samþykkt að verði fríverslunarsamningur ekki undirritaður fyrir áramót taki gildi bráðabirgðasamningur um vöruviðskipti uns fríverslunarsamningurinn er tilbúinn. Þann samning, sem var upphaflega gerður í apríl 2019, stóð til að nota ef útganga Bretlands úr ESB hefði verið án samnings. Óháð þessu munu fríverslunarviðræður halda áfram af fullum krafti,“ segir í tilkynningunni.
„Þannig er um að ræða tvær mögulegar sviðsmyndir: Annað hvort tekur gildi um áramótin nýr fríverslunarsamningur eða bráðabirgðasamningur um vöruviðskipti. Þótt gangurinn sé góður í fríverslunarviðræðunum er mikilvægt að við höfum tryggt óbreytt viðskiptakjör fyrir íslensk fyrirtæki við Bretland óháð því hvort þeim ljúki á tilsettum tíma,“ er haft eftir Guðlaugi Þór Þórðarsyni, utanríkis- og þróunarsamvinnuráðherra, í tilkynningunni.
Þá segir, að bráðabirgðasamningurinn tryggi að útflutningur til Bretlands lúti ekki hærri tollum en í dag. Markmið samningsins sé þannig að viðhalda gildandi kjörum þar til samið hafi verið um nýjan og viðameiri fríverslunarsamning á milli ríkjanna.
„Enn er óvíst um niðurstöðu fríverslunarviðræðna Bretlands og Evrópusambandsins þó báðir aðilar stefni að samningi. Bæði Bretar og EFTA-ríkin innan EES eru þó sammála um að viðræður þeirra á milli haldi óhikað áfram þótt að viðræður Evrópusambandsins og Bretlands skili ekki árangri,“ segir í tilkynningu ráðuneytisins.