Síminn fjárfestir í streymisveitu

Síminn hf. hefur keypt hlut í nýrri íslenskri streymisveitu, Uppkasti. Streymisveitan er sú fyrsta sinnar tegundar hér á landi að sögn stofnendanna, Stefáns Arnar Þórissonar og Arnars Arinbjarnarsonar. Hjá Uppkasti gefst fólki kostur á að miðla þekkingu sinni eða hæfileikum til áskrifenda og hafa af því tekjur eftir því hvað efnið er mikið spilað.

Þeir Stefán og Arnar segja í samtali við ViðskiptaMoggann að allt efnið sé á íslensku og efnistökin fjölbreytt. Hægt sé að fá aðgang að fjölbreyttum myndverum til að taka upp efni og senda það út í gegnum smáforrit Uppkasts.

Aðrir fjárfestar í verkefninu eru Ólafur Andri Ragnarsson, Jónas Björgvin Antonsson, Jón Gunnar Jónsson og Halldór H. Jónsson. Þá er Arcur Ráðgjöf, sem sérhæfir sig í þjónustu á sviði fjármála, stefnumótunar og sérhæfðrar ráðgjafar, meðal hluthafa Uppkasts.