Viðskipti | mbl | 22.3.2023 | 14:55 | Uppfært 15:45

Myllan í majónesið

Gunnars Majones er að líkingum til þekktasta vara Gunnar ehf. Myllan mun hér eftir sjá um sölu á sósum fyrirtækisins.

Myllan, Frón og Ora

Myllan, sem stofnuð var árið 1959, sérhæfir sig í markaðssetningu og framleiðslu á brauðum, kökum og skyldum vörum.
Frón, sem er stofnað árið 1926, framleiðir hið sívinsæla Frónkex, s.s. mjólkurkex, matarkex og kremkex, auk fleiri tegunda.
Ora var stofnað 1952 og hefur sérhæft sig í framleiðslu á niðursuðuvörum, m.a. fiskibollum, fiskbúðingi, grænum baunum og rauðkáli auk, fjölmargra annarra vörutegunda, svo sem síld, meðlæti, súpum o.fl.

Myllan-Ora ehf. hefur keypt Gunnar ehf, framleiðand hins víðfræga Gunnars majónes. Þetta kemur fram í tilkynningu þess efnis frá Myllunni.

Samningurinn er gerður með fyrirvara um samþykki Samkeppniseftirlitsins sem gerði Kaupfélag Skagfirðinga afturreka með kaup á Gunnar ehf í janúar síðastliðnum.

Gunnars majones var stofnað árið 1960 af hjónunum Gunnari Jónssyni og Sigríði Regínu Waage. Félagið varð gjaldþrota árið 2014 en Kleópatra Kristbjörg Stefánsdóttir keypti vörumerkið í kjölfarið. Hafa ýmsar sósur undir merkjum Gunnars verið framleiddar og seldar í verslunum.

Haft er eftir Hermanni Stefánsson, forstjóra Myllunnar-Ora í tilkynningu að hann telji „áhugaverð tækifæri felast í kaupunum. Vörumerkið Gunnars sé rótgróið íslenskt vörumerki sem styrki vöruframboð Myllunnar-Ora, auk samlegðar við rekstur fyrirtækisins. Innlend matvælaframleiðsla á undir högg að sækja í krefjandi umhverfi og kaupin á Gunnars eru til þess fallin að styrkja undirliggjandi rekstur og þannig grundvöll innlendrar matvælaframleiðslu,“ segir í tilkynningu.

Kaupverð er ekki uppgefið í tilkynningu en samkvæmt frétt Fréttablaðsins um málið nemur kaupverðið 600 milljónum króna.

Myllan, Frón og Ora

Myllan, sem stofnuð var árið 1959, sérhæfir sig í markaðssetningu og framleiðslu á brauðum, kökum og skyldum vörum.
Frón, sem er stofnað árið 1926, framleiðir hið sívinsæla Frónkex, s.s. mjólkurkex, matarkex og kremkex, auk fleiri tegunda.
Ora var stofnað 1952 og hefur sérhæft sig í framleiðslu á niðursuðuvörum, m.a. fiskibollum, fiskbúðingi, grænum baunum og rauðkáli auk, fjölmargra annarra vörutegunda, svo sem síld, meðlæti, súpum o.fl.