SÍA IV kaupir nýtt hlutafé í Örnu

Samkomulag hefur náðst á milli hluthafa mjólkurvinnslunnar Örnu á Bolungarvík og SÍA IV slhf., framtakssjóðs í rekstri Stefnis um kaup þess síðarnefnda á nýju hlutafé í Örnu.

Í fréttatilkynningu segir að hlutafjáraukningin komi til með að styðja við frekari vöxt félagsins og tryggja að félagið haldi áfram að vera brautryðjandi í vöruþróun og nýsköpun í framleiðslu á mjólkur- og hafravörum.

Hluthafar selja

Samhliða hlutafjáraukningunni hafa ákveðnir hluthafar ákveðið að selja sjóðnum hluti sína í félaginu, en Hálfdán Óskarsson, framkvæmdastjóri og stofnandi Örnu, verður áfram meðal stærstu hluthafa félagsins samkvæmt tilkynningunni.

„Við hjá Örnu erum gríðarlega ánægð með að fá Stefni inn sem kjölfestufjárfesti í félaginu á þessum tímapunkti og væntum við mikils af samstarfinu. Þekking og reynsla Stefnis mun styrkja félagið og gera okkur einstaklega vel í stakk búin til að grípa þau fjölmörgu tækifæri sem eru á markaðnum og taka þannig næsta skref í vexti og uppbyggingu félagsins.
Frá upphafi höfum við lagt mikinn metnað í að framleiða hollar, bragðgóðar, ferskar og umhverfisvænar vörur. Við erum full tilhlökkunar fyrir komandi tímum og hlökkum til að kynna viðskiptavini okkar fyrir nýjum og spennandi vörum," segir Hálfdán í tilkynningunni.

Framúrskarandi mjólkurvörur

Eiríkur Ársælsson sjóðstjóri sérhæfðra fjárfestinga hjá Stefni segir í tilkynningunni að Arna framleiði framúrskarandi mjólkurvörur í Bolungarvík og hafi byggt á þeim vörumerki sem vel flestir landsmenn þekkja. „Við erum því virkilega spennt fyrir því að fá að taka þátt í áframhaldandi uppbyggingu og vexti Örnu með starfsmönnum félagsins,“ segir Eiríkur.

• Blogga um frétt